បន្ទាយមានជ័យ៖ អាជ្ញាធរក្រុងសិរីសោភ័ណ និងស្រុកមង្គលបូរី នៃខេត្តបន្ទាយមានជ័យបានសម្រេចជម្លៀសពលរដ្ឋជិត ៤០០គ្រួសារ ទៅកាន់ទីទួលសុវត្ថិភាព ខណៈផលដំណាំកសិកម្មជាច្រើនហិកតា រងផលប៉ះពាល់។
យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយខេត្តបន្ទាយមានជ័យឱ្យដឹងថា គិតត្រឹមថ្ងៃទី២៥ ខែកញ្ញា ស្ថានភាពទឹកជំនន់ក្នុងក្រុងសិរីសោភ័ណ និងស្រុកមង្គលបុរី បានធ្វើឱ្យប៉ះពាល់ដល់ពលរដ្ឋចំនួន ១៥៥៩គ្រួសារ ដែលប៉ះពាល់ដល់ពលរដ្ឋចំនួន ៦៧១៥នាក់ ក្នុងនោះពលរដ្ឋចំនួន ៣៦៣គ្រួសារ ត្រូវបានអាជ្ញាធរជម្លៀសទៅកាន់ទីទួលសុវត្ថិភាព។
ស្ថានភាពទឹកក្នុងក្រុងស្រុកទាំងពីរក៏បានធ្វើឱ្យប៉ះពាល់ដល់សាលារៀន ១០កន្លែង វត្ត ២កន្លែង មណ្ឌលសុខភាព ១កន្លែង និងធ្វើឱ្យប៉ះពាល់ដល់ដំណាំកសិកម្មរបស់ពលរដ្ឋជិត ៨ពាន់ហិតា និងប៉ះពាល់ផ្លូវចំនួន ១២៧ផ្លូវ ដែលមានប្រវែងជាង ៨១គីឡូម៉ែត្រ។
រហូតមកដល់ព្រឹកថ្ងៃទី២៦ ខែកញ្ញា នេះស្ថានភាពទឹកនៅបន្តកើនឡើងហើយអាជ្ញាធរ កងកម្លាំង និងគណៈកម្មាធិការជាតិគ្រប់គ្រងគ្រោះមហន្តរាយ បានធ្វើការជម្លៀសពលរដ្ឋទៅកាន់ទីទួលសុវត្ថិភាពជាបន្តបន្ទាប់ផងដែរ៕
